eigentlich hab i dacht,
s‘ hat alles sei ordnung
i hab gwußt, wann i aufsteh und wann i mi niederleg
i hab gwußt, wer ma wichtig isch
und hab dacht, i woass, was morgen kimmt
und eigentlich hab i dacht,
s‘ hat alles sei ordnung
es schenste isch,
dass i bei mia bin
dass ma koana einiredn kann
dass i spiar, was i will
dass i nimma hirnwichs, wenn’s um mi geht
i trau mi ans leben
ans schene und schiache,
da darf’s mi zerreissn und in alle schtickln fetzn
denn danach wachs i zsammen
wia a neia mensch
und i werd reicher und schener
und mutiger und stärker
s’leben lasst mi von vorn anfangen,
wia a kloans kind,
des nit woass, was kimmt
i frag mi,
wia ma was zrucklassn kann,
wenn ma nit exischtiert
ma isch wia da anfang
und wie’s end von der welt
koa vor und koa zruck
manchmal bin i ganz groß und stark
da kann ma koana
da kann i bam ausreissn
ana welln widerstehn
da bin i stark
manchmal bin i kloan und so verletzlich
da reicht a lufthauch
und i glab, i bin nimma da
wia a bliamel, des ma ausreisst
und glei verbliaht
manchmal hab i’s gfühl
es gibt koa rätsel mehr
und zglaich isch alls a rätsel fia mi
da kannt’s bis in alle ewigkeit dauern
und geschtern vorbei gwesn sein
s’kannt alls so leicht sein
und trotzdem isch’s so schwierig
du woasch,
dass es leben manchmal a so a plag isch
und du moansch,
wenn di nur ducksch, geht alls vorbei